BAKI,AzerVoice
İran rəsmiləri bu həftə Qətər hökumətinə xəbərdarlıq edərək bildiriblər ki, əgər ABŞ İsraillə İran arasında mövcud münaqişəyə müdaxilə edərsə, Fars körfəzində yerləşən amerikalılara məxsus hərbi bazalar Tehran üçün legitim hədəfə çevriləcək.
AzerVoice xəbər verir ki, İranın diqqət çəkdiyi obyektlər arasında Qətərin paytaxtı Dohadan 20 kilometr məsafədə yerləşən Əl-Udeyd Hərbi-Hava Bazası, Bəhreyndəki ABŞ Hərbi-Dəniz Qüvvələri bazası və Küveytdəki Amerika hərbi obyektləri var.
Xatırladaq ki, daha əvvəl Ağ Evin mətbuat katibi Kerolayn Levit bildirib ki, ABŞ Prezidenti Donald Tramp yaxın iki həftə ərzində İrana qarşı mümkün hərbi zərbə qərarı verə bilər. Onun sözlərinə görə, Tramp həmçinin Tehranla yaxın gələcəkdə danışıqlar aparılmasının da mümkün olduğunu istisna etmir.
Xatırladaq ki, 13 iyun tarixində İsrail İranın müxtəlif şəhərlərində yerləşən nüvə obyektlərinə və ordunun yüksək rütbəli komandanlığına qarşı genişmiqyaslı hücumlar həyata keçirib.
Hücum nəticəsində İran Silahlı Qüvvələrinin Baş Qərargah rəisi, SEPAH-ın baş komandanı və bir neçə yüksək vəzifəli zabit, həmçinin doqquz nüvə alimi həyatını itirib.
İran Səhiyyə Nazirliyinin 15 iyun tarixli məlumatına əsasən, İsrailin hava zərbələri nəticəsində 224 mülki şəxs həlak olub, 1277-dən çox insan isə yaralanıb.
İranın cavab zərbəsi zamanı İsrail ərazisinə balistik raketlərlə hücum təşkil edilib. İran mediasının məlumatına görə, bu hücum nəticəsində İsraildə 25 nəfər ölüb, 500-dən çox insan yaralanıb.
