BAKI, AzerVoice
ABŞ prezidenti Donald Tramp, Kanadada keçirilən G7 (Yeddilər qrupu) sammitini vaxtından əvvəl tərk edib.
AzerVoice xəbər verir ki, bu barədə Financial Times qəzeti məlumat verib.
Məlumata görə, Trampın qərarının əsas səbəblərindən biri Fransa prezidenti Emmanuel Makrona qarşı yaranmış narazılıq, digəri isə Ukrayna prezidenti Volodimir Zelenski ilə görüşə maraq göstərməməsi olub.
Tramp sammitin rəsmi yekununa qatılmayıb. O, əvvəlcə bunun Yaxın Şərqdəki vəziyyətə görə olduğunu bildirsə də, daha sonra bu bəyanatın Fransa prezidenti Makron tərəfindən səhv anlaşıldığını deyib və onun Vaşinqtona başqa səbəblə qayıtdığını qeyd edib.
Nəşr yazır ki, Tramp Makronun sammitdən əvvəl Qrenlandiyaya səfər edib, orada təhlükəsizlik məsələlərini müzakirə etməsindən narazı qalıb. Makron Danimarkanın baş naziri Mette Frederiksen və Qrenlandiyanın hökumət başçısı Yens-Frederik Nilsenlə Arktikadakı təhlükəsizlik məsələləri barədə fikir mübadiləsi aparıb. Tramp isə daha əvvəl Qrenlandiyanın ABŞ-a birləşdirilməli olduğunu bəyan etmişdi və bu məsələ tərəflər arasında uzunmüddətli mübahisə doğurmuşdu.
Trampın sammiti yarımçıq tərk etməsinə səbəb olan digər məqam Zelenski ilə planlaşdırılan görüşə maraq göstərməməsi olub. Tramp bu görüşdən yayınaraq G7 liderlərinin İran-İsrail münaqişəsinə dair birgə bəyanatını da imzalamayıb.
Ağ Ev isə Trampın Vaşinqtona qayıtmasının səbəbi kimi “bir sıra mühüm məsələlərin həllini” göstərib. Tramp isə Makronun onun atdığı addımları daim yanlış anladığını vurğulayıb.
