BAKI, AzerVoice, Nailə Babazadə

Fransa Prezidenti Emmanuel Makron suriyalı həmkarı Əhməd əş-Şəraanı “İŞİD” terror təşkilatına qarşı beynəlxalq koalisiyaya qoşulmağa dəvət edib. O, həmçinin BMT Təhlükəsizlik Şurasının prezident əş-Şəraa və daxili işlər naziri Ənəs Xitabın adlarını sanksiya siyahısından çıxarmaq qərarını alqışlayıb.

AzerVoice xəbər verir ki, Makron bu açıqlamanı Braziliyanın Belin şəhərində keçirilən iqlim konfransının kənarında suriyalı həmkarı ilə görüşdən sonra jurnalistlərə verib. Onun sözlərinə görə, Suriya “regionda terrorçu qruplara qarşı mübarizədə tam və effektiv tərəfdaş olmağa” dəvətlidir.

Fransa lideri bildirib ki, Paris və Dəməşq arasında təhlükəsizlik əməkdaşlığı “fransızların təhlükəsizliyinin qorunması üçün vacibdir”.

Makron, 2015-ci ilin noyabrında Parisdə törədilən terror hücumlarını xatırladaraq, bu hadisələrin planlaşdırılmasının Suriyada həyata keçirildiyini vurğulayıb: “Heç kim unutmadı ki, Paris hücumlarının planlaşdırılması Suriyada baş vermişdi. Bu məsələ birbaşa Fransanın milli təhlükəsizliyi ilə bağlıdır.”