BAKI, AzerVoice
Amerikalı təyyarə istehsalçısı Boeing-in səhmləri, Hindistanın Ahmedabad şəhərində Air India aviaşirkətinə məxsus sərnişin təyyarəsinin qəzaya uğramasından sonra kəskin şəkildə ucuzlaşıb.
AzerVoice xəbər verir ki, şirkətin Nyu-York birjasında ticarət olunan səhmləri açılış öncəsi əməliyyatlarda təxminən 8 faiz dəyər itirib.
Hindistan mediasının verdiyi məlumata görə, Sardar Vallabhbhai Patel Beynəlxalq Hava Limanından Londonun Gatwick hava limanına doğru uçan Boeing 787-8 Dreamliner tipli təyyarə qalxışdan qısa müddət sonra qəzaya uğrayıb.
Hadisə Gucarat ştatının Ahmedabad şəhəri yaxınlığında baş verib.
Air India-nın 171 saylı reysi ilə bağlı rəsmi rəqəmlər açıqlanmasa da, India Today qəzetinin məlumatına görə, təyyarədə 230 sərnişin və 12 ekipaj üzvü olmaqla ümumilikdə 242 nəfər olub.
Qəzanın səbəbi ilə bağlı hələlik rəsmi açıqlama verilməyib. Hadisə ilə bağlı Hindistan və beynəlxalq aviasiya qurumlarının araşdırmalara başladığı bildirilir. Boeing şirkəti isə hələlik məsələ ilə bağlı açıqlama yaymayıb.