BAKI, AzerVoice

ABŞ-ın vitse-prezidenti Cey Di Vens və Ağ Evin aparat rəhbəri Syuzan Vails ABŞ Prezidenti Donald Tramp ilə əlaqələrini bərpa etməsi üçün İlon Maska çağırış ediblər.

AzerVoice xəbər verir ki, bu barədə "The Wall Street Journal" (WSJ) qəzeti öz mənbələrinə istinadən məlumat yayıb.

Qeyd edək ki, Vens və Vails iyunun 6-da Mask ilə telefon danışığı zamanı gərginliyin azaldılmasına çağırıblar. Qəzetin məlumatına görə, ABŞ-ın vitse-prezidenti Trampı dəstəkləyib, lakin Maskı tənqid etməyib.

Xatırladaq ki, Tramp və Mask iyunun 5-də sosial şəbəkələrdə kəskin bəyanatlarla fikir mübadiləsi aparıblar. Mask, ötən ilin noyabrındakı seçkilərdə onun dəstəyi olmadan Trampın qalib gələ bilməyəcəyini iddia edib, Trampa impiçment elan olunması ideyasını dəstəkləyib, Ağ Ev tərəfindən təklif edilən dövlət xərclərinin azaldılmasına dair qanun layihəsini və Tramp tərəfindən tətbiq edilən idxal rüsumlarını tənqid edib, həmçinin cari ilin ikinci yarısında ABŞ iqtisadiyyatının tənəzzülə uğrayacağını proqnozlaşdırıb. Öz növbəsində Tramp Maskı federal hökumətin işinin səmərəliliyini artırmaq üçün məsul olduğu quruma rəhbərlik edərkən öz vəzifələrini "vicdanla yerinə yetirməməkdə" və "dəli olmaqda" ittiham edib. Tramp Maskın şirkətləri, o cümlədən "SpaceX" ilə dövlət müqavilələrini ləğv etməklə və bütün subsidiyaları dayandırmaqla hədələyib.

Daha sonra isə Mask, Tramp barədə yazdığı bəzi paylaşımlarına görə təəssüf hissi keçirdiyini bildirib. "New York Post" qəzetinin dərc etdiyi "Pod Force One" adlı podkastın efirində ABŞ Prezidenti, Maskı bağışlaya biləcəyini deyib.