BAKI, AzerVoice

Fələstin dövlətini tanımaq həm mənəvi öhdəlik, həm də siyasi zərurətdir.

AzerVoicexəbər verir ki, Fransa Prezidenti Emmanuel Makron Fələstin dövlətinin tanınmasının yalnız mənəvi deyil, eyni zamanda siyasi bir tələb olduğunu bəyan edib.

Sinqapurda keçirdiyi mətbuat konfransında çıxış edən Makron bildirib ki, Qəzzada humanitar vəziyyətin daha da pisləşəcəyi təqdirdə, Avropa İttifaqı ölkələri İsrailə qarşı ortaq mövqelərini sərtləşdirməlidirlər.

Fransa lideri həmçinin ABŞ-ın Rusiyaya qarşı siyasətinə də toxunaraq qeyd edib ki, Vaşinqton Rusiya ilə bağlı atəşkəs məsələsində qəti mövqe sərgiləməlidir. “Əgər Rusiya sülh bağlamaq istəmədiyini sübut edərsə, ABŞ-ın onu sanksiyalarla cəzalandırmaq öhdəliyi bir daha təsdiq olunmalıdır”, – deyə Makron bildirib.

Makron 48 saat öncə ABŞ Prezidenti Donald Trampla danışdığını da açıqlayaraq, “O, bu məsələ ilə bağlı narahatlığını ifadə etdi. İndi isə əsas məsələ nə edəcəyimizdir – biz hazırıq”, – deyə vurğulayıb.

Qeyd edək ki, Emmanuel Makron hazırda Cənub-Şərqi Asiya səfəri çərçivəsində Sinqapurda səfərdədir. Bu səfər Vyetnam və İndoneziyanı da əhatə edən regional turun son dayanacağıdır.