BAKI, AzerVoice
Rusiya Prezidenti Vladimir Putin və ABŞ Prezidenti Donald Tramp arasında telefon danışığı baş tutub.
AzerVoice xəbər verir ki, telefon danışığı bir saat davam edib.
Söhbət zamanı, iki lider İran ətrafındakı vəziyyəti və ümumilikdə Yaxın Şərq məsələlərini müzakirə ediblər. Bu barədə Rusiya prezidentinin köməkçisi Yuri Uşakov jurnalistlərə məlumat verib. Rusiya Prezidentinin köməkçisi Yuri Uşakov bildirib ki, Rusiya tərəfi, bütün mübahisəli məsələlərin, fikir ayrılıqlarının və münaqişə vəziyyətlərinin yalnız siyasi-diplomatik vasitələrlə həllinin vacibliyini vurğulayıb.
"Bu məsələyə dair əlaqələrin xarici işlər nazirlikləri, müdafiə nazirlərinin iştirakı ilə və prezident köməkçiləri arasında davam etdirilməsi razılaşdırılıb" - deyə, Uşakov qeyd edib.
Həmçinin bildirilib ki, telefon danışığı zamanı Suriyadakı son vəziyyət də müzakirə mövzusu olub.
"Suriyadakı son hadisələr də müzakirə edilib. Bu istiqamətdə Rusiya və Amerika tərəfləri oxşar şəkildə dialoqu davam etdirəcəklər" - deyə, Uşakov bildirib.
Bununla yanaşı, Putin Trampı 4 İyul - ABŞ-ın müstəqillik günü münasibətilə təbrik edib.