BAKI,AzerVoice
Tramp administrasiyası Harvard Universiteti ilə bütün federal
müqavilələrin ləğvini tələb edir.
AzerVoice
xəbər verir ki, ABŞ-da Donald Tramp administrasiyası Harvard
Universitetinə qarşı ciddi maliyyə addımları atmağa başlayıb.
Mətbuata sızan məlumata əsasən, administrasiya federal qurumlardan
universitetlə mövcud olan təxminən 100 milyon dollarlıq
müqavilələrin ləğvini tələb edib.
Yüksək rütbəli, adı açıqlanmayan rəsmilərə istinadən yayılan xəbərlərə görə, bu addım Harvardda Fələstinə dəstək məqsədilə keçirilən aksiyalara cavab olaraq atılıb. Beləliklə, Harvard ilə federal qurumlar arasında bu günə qədər mövcud olmuş ümumilikdə 2,6 milyard dollara yaxın federal maliyyə əlaqəsinin tamamilə kəsilməsi gündəmdədir.
Qeyd edək ki, Tramp administrasiyası daha öncə də Harvard da daxil olmaqla, müxtəlif universitetlərin Fələstinə dəstək aksiyaları və kampuslarda keçirilən müxtəliflik, bərabərlik və inklüzivlik proqramlarına istinad edərək maliyyə yardımlarını dondurmaqla hədələyib.
Bu çərçivədə ABŞ Ədliyyə Nazirliyi, Səhiyyə və İnsan Xidmətləri Departamenti, Təhsil Nazirliyi və Ümumi Xidmətlər İdarəsi (GSA) birgə “Antisemitizmlə Mübarizə Qrupu” yaratmışdı. Hökumət Harvard Universitetinə ayrılmış 2,2 milyard dollarlıq maliyyə yardımını və əlavə 60 milyon dollarlıq müqavilə haqlarını dondurmağa qərar verdi. Universitet isə bu qərarın qanunsuz olduğunu bildirərək məhkəməyə müraciət edib.
Eyni zamanda, ABŞ-ın Daxili Təhlükəsizlik Naziri Kristi Noem Harvard Universitetinə məktub ünvanlayaraq beynəlxalq tələbə qəbulunun dayandırıldığını açıqlayıb. Lakin Boston bölgəsinin federal hakimi Allison Burroughs bu qərarı müvəqqəti olaraq dayandırıb.
