BAKI, AzerVoice
Qəzza zolağında baş verənlər qəbuledilməzdir.
AzerVoice xəbər verir ki, bu barədə Vatikan Dövlət Katibi (Baş nazir) Kardinal Pietro Parolin bildirib.
O, İsrailin Qəzzaya hücumlarının dərhal dayandırılmasının zəruriliyini vurğulayıb.
“Beynəlxalq humanitar hüquq hər zaman və hər kəs üçün keçərli olmalıdır. Bombardmanların dayandırılmasını və əhaliyə lazım olan yardımların çatdırılmasını istəyirik. Beynəlxalq ictimaiyyətin bu faciəyə son vermək üçün əlindən gələni etməsinə inanırıq” - deyə, Kardinal Parolin Vatikan mətbuatına verdiyi müsahibədə qeyd edib.
Parolin eyni zamanda HƏMAS-ın əlində olan bütün əsirlərin dərhal azad edilməsi və 2023-cü il oktyabrın 7-də həyatını itirənlərin cəsədlərinin təhvil verilməsinə çağırıb.
O, həmçinin Vatikanın Rusiya və Ukrayna arasında aparılan danışıqlara ev sahibliyi etmə təklifinin gündəmə gəlməsi və Rusiyanın buna qarşı çıxması məsələsinə də diqqət çəkib.
“Papa XIV Leo, mümkün danışıqlara ev sahibliyi etmək baxımından Vatikanın tam şəkildə hazır olduğunu bildirdi və tərəflərə neytral, təhlükəsiz bir məkan təklif etdi. Bu, vasitəçilik demək deyil, çünki vasitəçilik tərəflərin istəyi ilə həyata keçirilə bilər. Bu halda isə sadəcə mümkün bir görüşü qəbul etməyə dair açıq təklif var idi” - deyə, Kardinal yekunlaşdırıb.
