BAKI, AzerVoice

Fransa Prezidenti Emmanuel Makronun Vyetnam Respublikasına dövlət səfəri çərçivəsində iki ölkə arasında ümumi dəyəri 9 milyard avro olan bir sıra mühüm müqavilələr imzalanıb.

AzerVoice xəbər verir ki, Fransa lideri bildirib ki, bu müqavilələr əsasən aviasiya, dəmir yolu, müdafiə və enerji sahələrini əhatə edir.

"Bu müqavilələr Fransa ilə Vyetnam arasında güclü əməkdaşlığın göstəricisidir və strateji tərəfdaşlığımızın genişlənməsinə xidmət edir" – deyə Makron vurğulayıb.

Rəsmi statistikaya görə, Fransa 2024-cü ildə Vyetnamın Avropada beşinci ən böyük ticarət tərəfdaşı olub. İki ölkə arasında ticarət dövriyyəsi 2023-cü illə müqayisədə 12,9 faiz artaraq 5,42 milyard ABŞ dollarına çatıb.

Hazırda Fransa Vyetnamda sərmayə qoyan 147 ölkə və region arasında 16-cı yerdədir. Ölkədə Fransaya məxsus ümumi dəyəri 3,95 milyard dollar olan 700-ə yaxın investisiya layihəsi fəaliyyət göstərir.

Fransa, eyni zamanda, Vyetnama qrant və güzəştli maliyyə yardımları göstərən əsas Avropa ölkəsi olaraq çıxış edir. Paris indiyədək Hanoya 16,7 milyard avro həcmində güzəştli kredit təqdim edib. Bu vəsaitlər əsasən infrastruktur, kənd təsərrüfatı, yaşıl sənaye, maliyyə və texnoloji keçid layihələrinə yönəldilib.