BAKI, AzerVoice

İsrail, HƏMAS-ın 5 məhbusun azad edilməsi ilə bağlı təklifini rədd edib.

AzerVoice xəbər verir ki, The Jerusalem Post İsrail rəsmisinə istinadla Tel-Əvivin HƏMAS-ın beş əsirin azad edilməsini nəzərdə tutan təklifini rədd etdiyini bildirib.

Məlumata görə, İsrail bu təklifi “danışıqlar aparmaq istədikləri əsas prinsiplərdən uzaq” hesab edib.

HƏMAS tərəfindən hazırlanmış təklif əvvəlcə arxa kanallar vasitəsilə ABŞ-a təqdim olunub, daha sonra ABŞ bu təklifi İsrailə çatdırıb. Vaşinqtonun bu plana dəstək verib-vermədiyi isə açıqlanmayıb.

Təklifə əsasən, mart ayında qüvvədə olan əvvəlki atəşkəsdən sonra İsrail ordusunun geri çəkilməsi, Qəzza zolağına humanitar yardımın maneəsiz daxil olmasına şərait yaradılması və diri və ya ölü vəziyyətdə olan bütün əsirlərin azad edilməsi məqsədilə danışıqların davam etdirilməsi qarşılığında HƏMAS beş məhbusu azad etməyə hazır olduğunu bildirib.

Qeyd edək ki, The Jerusalem Post Tramp administrasiyasının fələstin əsilli amerikalı iş adamı və “Sülh Naminə Ərəb Amerikalılar” qrupunun rəhbəri Bişara Bəhbə vasitəsilə HƏMAS ilə əlaqə kanalı qurduğunu yazıb. Bişara Bəhbə bu təkliflə yanaşı, ABŞ vətəndaşı olan İsrail əsgəri Edan Alexander-in azad edilməsi ilə bağlı da vasitəçilik edib.

ABŞ prezidenti Donald Tramp isə Nyu Cersidən Vaşinqtona qayıdarkən jurnalistlərə verdiyi açıqlamada Qəzza zolağındakı müharibənin “mümkün qədər tez” başa çatmasını istədiyini bildirib.