BAKI,
AzerVoice
İsrail naziri Fələstin torpaqlarını öz ərazisinə qatmaqla
hədələyir.
AzerVoice xəbər verir ki, İsrailin
xarici işlər naziri Gideon Saar bəzi Avropa ölkələrinin Fələstini
tanıması halında ölkəsinin İordan çayının qərb sahilindəki yaşayış
məntəqələrini və İordaniya vadisini öz ərazisinə qatacağı ilə
hədələyib.
Saar bildirib ki, Fransa və İngiltərə kimi ölkələr Fələstin
dövlətini tanımaq qərarı verərsə, buna cavab olaraq İsrail həmin
bölgələri birtərəfli qaydada özünə birləşdirə bilər. Onun sözlərinə
görə, bu addım Avropa ölkələrinin atdığı birtərəfli siyasi
qərarlara cavab olacaq.
“İsrailə qarşı atılacaq hər hansı birtərəfli addımın cavabı, eyni şəkildə, İsrailin də birtərəfli addımları olacaq” - deyə Saar vurğulayıb.
Bu açıqlamalar, Fransa prezidenti Emmanuel Makronun təşəbbüsü və Səudiyyə Ərəbistanının dəstəyi ilə iyunun 18-də Nyu-Yorkda keçiriləcək və Fələstin dövlətinin tanınmasının müzakirə olunacağı beynəlxalq konfrans ərəfəsində səsləndirilib. Diplomatik mənbələrə görə, Makron həmin tarixdə bir çox ölkənin Fələstini tanımasını hədəfləyir.
Eyni zamanda, qəzet ABŞ-ın bu konfransda iştirak etməyəcəyini, lakin digər ölkələrə təzyiq göstərmək niyyətində olmadığını yazıb.
Qeyd edək ki, hazırda BMT-yə üzv 193 ölkədən 149-u Fələstin dövlətini tanıyır və iyunda keçiriləcək beynəlxalq tədbirdə bu sayın artacağı gözlənilir.
