BAKI, AzerVoice
Meksikada üzərində “CIA” yazılmış kimlik kartı daşıyan ABŞ vətəndaşı silah gəzdirməkdə təqsirləndirilərək saxlanılıb.
AzerVoice xəbər verir ki, bu barədə Meksika Əyalət Təhlükəsizlik Katibliyinin "X" sosial şəbəkəsində verdiyi açıqlamada bildirilib.
Qeyd olunub ki, adı açıqlanmayan ABŞ vətəndaşı “ictimai asayişi pozmaq” və “yalnız orduya məxsus olan silahları daşımaq” ittihamları ilə saxlanılıb.
Şəxsin üzərində 6 odlu silah, daraqlar, döyüş sursatı və taktiki avadanlıq aşkarlanıb. Açıqlamada onun üzərində “CIA” yazısı olan bir şəxsiyyət vəsiqəsinin də tapıldığı qeyd edilib.
ABŞ Dövlət Departamenti Fox News-a verdiyi açıqlamada bu hadisə ilə bağlı məlumatlı olduqlarını bildirib.
Meksikalı rəsmilər həmin şəxsin kimliyi, ölkəyə niyə gəldiyi və ABŞ Mərkəzi Kəşfiyyat İdarəsi (CIA) ilə hər hansı bir əlaqəsi olub-olmadığı barədə əlavə məlumat verməyib.
