BAKI, AzerVoice

Liberiya bayrağı altında üzən "MSC ELSA 3" adlı konteyner daşıyan gəmi Hindistanın cənubundakı Kerala ştatının Koçi şəhəri sahillərindən 38 dəniz mili uzaqlıqda, Ərəb dənizində batıb.

AzerVoice xəbər verir ki, bu barədə Hindistan Sahil Mühafizəsi məlumat yayıb. Bildirilib ki, gəmidə təhlükəli yüklər olub.

Məlumata əsasən, gəmidə ümumilikdə 640 konteyner olub, bunlardan 13-ü təhlükəli maddələrlə, 12-si isə kalsium karbid ilə dolu imiş. Gəminin yanacaq çənlərində 84,44 ton dizel və 367,1 ton mazut da olub. İlkin məlumatlara görə, konteyner gəmisi bir bölmənin su ilə dolması nəticəsində tamamilə aşağı çevrilib, bu da yanacaq sızması riski yaradır.

Hindistan Sahil Mühafizəsi bildirib ki, hadisəyə dair bütün mümkün ssenarilər üzrə ştat administrasiyası ilə birgə araşdırmalar aparılır. Sahil Mühafizəsinə məxsus neft ləkələrini müəyyən etmək üçün müasir texnologiyalarla təchiz olunmuş təyyarələr hadisə yerində havadan müşahidə aparır. Hazırda neft sızması ilə bağlı rəsmi məlumat daxil olmayıb.

Hindistanın Təbii Fəlakətlərlə Mübarizə üzrə Dövlət Agentliyi isə sahilyanı bölgə sakinlərinə dəniz dalğası ilə sahilə çıxa biləcək gəmi qalıqlarına yaxınlaşmamağı tövsiyə edib. Bu cür obyektlər zəhərli və ya partlayıcı ola bilər.