BAKI, AzerVoice

Avropa ölkələri, əgər ABŞ prezidenti Donald Tramp administrasiyası Ukraynaya birbaşa hərbi yardımı dayandırarsa, bu yardımı davam etdirmək məqsədilə Amerika silahlarını böyük həcmdə almaqda maraqlıdır.

AzerVoice xəbər verir ki, bu barədə Bloomberg agentliyi öz mənbələrinə istinadən məlumat yayıb.

Məlumata görə, Avropanın nə kifayət qədər silah ehtiyatı, nə də bu silahları özü istehsal etməyə imkanı var. ABŞ-ın iştirakı olmadan Kiyevə tədarükü davam etdirmək Avropa üçün çətindir. Bu səbəbdən bir çox Avropa ölkəsi çıxış yolunu ABŞ-dan daha çox silah alıb, sonra onları Ukraynaya göndərməkdə görür.

Ekspertlərin qiymətləndirməsinə əsasən, ABŞ-ın sabiq prezidenti Co Baydenin dövründə təsdiqlənmiş hərbi yardım bu yay tükənə bilər. Nəşr qeyd edir ki, bundan sonra yaranacaq boşluğu Qərbin doldurması çox çətin olacaq.

Qeyd edək ki, daha əvvəl Ukrayna Prezidenti Ofisinin müşaviri Mixail Podolyak "Le Point" jurnalına müsahibəsində ABŞ-ın hərbi yardımını dayandıra biləcəyi ehtimalının Kiyevi narahat etdiyini bildirmişdi.