BAKI, AzerVoice
İsrailin Qəzza zolağına etdiyi hücumlar qətiyyən qəbul edilə bilməz.
AzerVoice xəbər verir ki, bunu İspaniya Xarici İşlər Naziri Xose Manuel Albarez deyib.
“Son günlərdə Qəzzada həyata keçirilən hücumlarda 200-dən çox insanın həyatını itirməsi qətiyyən qəbul edilə bilməz. Qəzzadakı vəziyyət kritik və son dərəcə qeyri-insanidir. Şiddətin artmasını qətiyyətlə qınayıram” – deyə, Albarez bildirib.
“Düşmənçiliyin dərhal dayandırılmasını tələb edirəm. Fələstin xalqının sülh və ümid içində yaşamaq hüququ var” – deyə, o əlavə edib.
Albarez, İspaniyanın xarici siyasətinin əsas hədəfinin ədalətli və davamlı sülhə nail olmaq üçün iki dövlətli həllin həyata keçirilməsi olduğunu xatırladıb.
Bundan əvvəl, İspaniya Baş naziri Pedro Sançes də Bağdadda keçirilən 34-cü Ərəb Liqası Zirvəsində çıxışı zamanı Qəzza və İordan çayının qərb sahilində baş verən hadisələrin Avropa və dünyanın qalan hissəsi tərəfindən görməzlikdən gəlinə bilməyəcəyini vurğulayıb.
Qeyd edək ki, İsrail ordusu, yanvarın 19-da qüvvəyə minmiş atəşkəsi martın 18-də pozaraq Qəzzaya qarşı genişmiqyaslı hücumlara yenidən start verib.
Bu hücumlar nəticəsində əksəriyyəti qadın, uşaq və yaşlılardan ibarət olmaqla 3 min 193 fələstinli həyatını itirib, 8 min 993 nəfər yaralanıb.
2023-cü ilin oktyabrın 7-dən bu yana İsrailin Qəzza zolağına etdiyi hücumlar nəticəsində ölən fələstinlilərin ümumi sayı 53 min 339-a, yaralıların sayı isə 121 min 34-ə çatıb.
