BAKI, AzerVoice
Dohada Həmas ilə İsrail arasında atəşkəs danışıqları başlayıb.
AzerVoice xəbər verir ki, Qəzzada uzun müddətdir davam edən münaqişəyə son qoymaq məqsədilə Dohada Həmas və İsrail arasında atəşkəs danışıqları rəsmən başlanıb.
Həmas rəsmisi Tahir əl-Nono Qətərdə müharibədə vasitəçi rolunu oynayan tərəflərin iştirakı ilə atəşkəs danışıqlarının yeni mərhələsinin həyata keçirildiyini bildirib.
Fələstin Səhiyyə Nazirliyinin açıqlamasına görə, İsrailin 7 oktyabr 2023-cü ildən bəri Qəzza zolağına qarşı hücumları nəticəsində ölənlərin sayı 53 min 272 nəfərə, yaralıların sayı isə 120 min 673-ə çatıb.
ABŞ prezidenti Donald Tramp da Yaxın Şərq turunun son mərhələsində Birləşmiş Ərəb Əmirliklərini tərk etməzdən əvvəl Fox News kanalına müsahibəsində Rusiya-Ukrayna müharibəsi, Qəzza və Suriyaya qarşı sanksiyaların ləğvi kimi mövzuları müzakirə edib.
Tramp, tur zamanı görüşdüyü liderlərin Qəzzada insanların qidaya
çıxışının olmadığını diqqətə çatdırdığını və orada aclıq səbəbindən
insanların həyatını itirdiyini vurğulayıb. O, problemin mürəkkəb
olduğunu, lakin həllinə çalışdıqlarını bildirib.
“Mən bu məsələ üzərində işləməyə başladım. Bu, dərin problemdir,
lakin biz bunu həll edəcəyik,” – deyə Tramp əlavə edib.
