BAKI, AzerVoice

Donald Tramp Qəzzada aclıqdan ölən insanlarla bağlı narahatlığını dilə gətirib.

AzerVoicexəbər verir ki, ABŞ prezidenti Donald Tramp Yaxın Şərq səfəri çərçivəsində Fox News telekanalına verdiyi müsahibədə Qəzza zolağında aclıqdan əziyyət çəkən insanlarla bağlı fikirlərini bölüşüb.

Tramp bildirib ki, bölgədə ciddi humanitar böhran yaşanır və bir çox insan ərzağa çıxış imkanının olmaması səbəbilə həyatını itirir. “Mən bu məsələ üzərində işləməyə başladım. Bu, dərin problemdir, lakin biz bunu həll edəcəyik”, – deyə Tramp qeyd edib.

Tramp müsahibəsində vurğulayıb ki, Yaxın Şərq səfəri zamanı görüşdüyü üç lider də Qəzzadakı vəziyyəti onun diqqətinə çatdırıb və aclığın dayandırılması üçün ABŞ-dan dəstək istəyiblər. O, bu çağırışların cavabsız qalmayacağını bildirib.

Tramp eyni zamanda Rusiya-Ukrayna müharibəsinə toxunaraq, vəziyyəti sabitləşdirmək üçün Rusiya prezidenti Vladimir Putinlə birbaşa görüş keçirməli olduğunu deyib. “Putinlə çox yaxşı münasibətim var. Düşünürəm ki, razılaşacağıq. Müharibəni dayandırmaq üçün bir araya gəlməliyik və bunun planlaşdırılması üzərində işləyirik”, – deyə o qeyd edib. Tramp, Ukrayna prezidenti Volodimir Zelenski ilə görüşünü isə çətin kimi qiymətləndirib.

Suriyaya qarşı tətbiq olunan sanksiyalarla bağlı danışan Tramp bildirib ki, regionda keçirdiyi görüşlərdən sonra bu sanksiyaların ləğvini nəzərdən keçirməyə qərar verib. O, Suriyanın yeni prezidenti Əhməd Şaraa ilə tanış olduğunu bildirib və onu “gənc və yaraşıqlı lider” kimi xarakterizə edib. Tramp qeyd edib ki, Suriyaya yeni başlanğıc üçün şans verilməlidir.

Qeyd edək ki, Donald Tramp Yaxın Şərq səfəri çərçivəsində Səudiyyə Ərəbistanı, Qətər və Birləşmiş Ərəb Əmirliklərində yüksək səviyyəli görüşlər keçirib. Səfər zamanı regional problemlər, iqtisadi əməkdaşlıq və humanitar böhranlar əsas müzakirə mövzusu olub.