BAKI, AzerVoice
BMT Qəzzada ərzaq təhlükəsizliyinin aclıq fəlakəti mərhələsinə çatdığını bildirib.
AzerVoice xəbər verir ki, Birləşmiş
Millətlər Təşkilatının Ərzaq və Kənd Təsərrüfatı Təşkilatı (FAO) və
Ümumdünya Ərzaq Proqramının (WFP) açıqladığı Qlobal Qida Böhranı
Hesabatında Qəzza zolağında kəskin ərzaq çatışmazlığının ən son və
ən təhlükəli mərhələyə – fəlakətli aclıq səviyyəsinə çatdığı
vurğulanıb.
Hesabat humanitar yardımların dayandırılması fonunda
hazırlanıb.
Qeyd edək ki, FAO və WFP-nin Avropa İttifaqı və digər tərəfdaşlarla birlikdə yaratdığı Ərzaq Böhranına Qarşı Qlobal Şəbəkə (GNAFC) tərəfindən hazırlanan hesabatda 2024-cü ildə 65 ölkə və ya ərazidən 53-də 295 milyondan çox insanın yüksək səviyyəli ərzaq çatışmazlığı ilə üzləşəcəyi bildirilib. Bu göstərici ötən illə müqayisədə 13,7 milyon nəfər artım deməkdir.
Hesabatda kəskin ərzaq böhranının əsas səbəbləri sırasında silahlı münaqişələr (140 milyon insan), iqtisadi sarsıntılar (59 milyon insan) və ekstremal hava hadisələri (96 milyon insan) qeyd olunub. Əfqanıstan, Keniya və Ukrayna da daxil olmaqla 15 ölkədə isə müəyyən yaxşılaşma müşahidə edilib.
Ən ağır vəziyyətin yaşandığı Qəzza və Sudanda əhalinin 5-ci mərhələ – “fəlakət/aclıq” səviyyəsində olduğu, bu kateqoriyada olan insanların 95 faizindən çoxunun bu iki ərazidə yaşadığı vurğulanır. Hesabatda Qəzzaya mart ayının əvvəlindən bəri heç bir ərzaq, tibbi yardım və yanacağın daxil ola bilmədiyi, bölgədə kütləvi köç və ölüm halları ilə müşayiət olunan humanitar fəlakətin davam etdiyi qeyd olunur.
