BAKI, AzerVoice

Sebiya Avropa İttifaqına (Aİ) üzvlük hədəfindən imtina etmir və bu istiqamətdə islahatları sürətləndirmək niyyətindədir.

AzerVoice xəbər verir ki, Serbiya Prezidenti Aleksandar Vuçiçin bu açıqlaması, Moskvaya səfərindən sonra Qərb dövlətlərinin ünvanladığı tənqidlər fonunda verilib.

Vuçiç, 8–9 may tarixlərində Moskvada keçirilən İkinci Dünya Müharibəsində qələbənin 80-ci ildönümünə həsr olunmuş tədbirlərdə iştirak edib və bu səfər çərçivəsində Rusiya Prezidenti Vladimir Putin və Çin Prezidenti Si Cinpin ilə görüşüb.

Prezident Vuçiç bu bəyanatı Avropa Şurasının Prezidenti Antoniu Kosta ilə keçirdiyi görüşdən sonra verib. O bildirib ki, Serbiya Aİ ilə danışıqlarda daha çox başlıq açmaq və üzvlük prosesini sürətləndirmək niyyətindədir.

“Moskvaya səfərim səbəbilə Avropadakı atmosfer çox da yaxşı deyil kimi görünür, lakin mən əminəm ki, Avropa layiq olduğumuz irəliləyişə anlayış göstərəcək” – deyə Vuçiç vurğulayıb.

Serbiyanın Rusiyaya olan tarixi və enerji asılılığı da bu məsələdə diqqət mərkəzindədir. Rusiya Serbiyanın əsas təbii qaz təchizatçısıdır və “Qazprom”la “Qazpromneft” NIS neft şirkətində böyük paylara malikdir. Moskva eyni zamanda Belqradın Kosovonun müstəqilliyinə qarşı mövqeyini də dəstəkləyir.

Ölkədə son aylarda korrupsiyaya qarşı, xüsusən universitet tələbələrinin öncülük etdiyi etirazlarla qarşılaşan Vuçiç, Aİ-yə üzvlük üçün tələb olunan bütün islahatların həyata keçiriləcəyini bəyan edib.

“Ortaq xarici və təhlükəsizlik siyasətimizin əsas tərkib hissəsi Rusiyanın Ukraynaya qarşı işğalını açıq şəkildə pisləmək və Ukraynanın ədalətli və dayanıqlı sülhə çatmasına dəstək verməkdir”- deyə Avropa Şurasının Prezidenti Antoniu Kosta bildirib.

Kosta əlavə edib ki, Serbiyanın Aİ-yə üzvlüyü prioritet kimi görməyə davam etməsi müsbət qarşılanır və ölkədə media azadlığının gücləndirilməsi, korrupsiya ilə mübarizə və seçki qanunvericiliyinin təkmilləşdirilməsi zəruridir.