BAKI, AzerVoice
Avropa İttifaqı (Aİ) artıq Rusiyaya qarşı növbəti sanksiyalar paketini hazırlayır.
AzerVoice xəbər verir ki, bu haqda Almaniya kansleri Fridrix Mers məlumat verib.
Məlumata görə, bu barədə qərar iyun ayının sonunadək qəbul edilməlidir.
Almaniya kansleri qeyd edib ki, sanksiyalar enerji sahəsini və həmçinin “kölgə donanması” adlandırılan sistemləri əhatə edəcək.
"Biz bu prosesi ardıcıl şəkildə və Avropa İttifaqı çərçivəsində mümkün qədər sıx əməkdaşlıqla həyata keçirmək əzmindəyik. Bu işi təkbaşına görə bilmərik. Lakin tərəddüd edən ölkələri bu yolun düzgün olduğuna inandırmağa çalışacağıq" - deyə, Mers bildirib.
Xatırladaq ki, ötən həftə Avropa Komissiyası (AK) Aİ ölkələrinə Rusiyaya qarşı 17-ci sanksiyalar paketini təqdim edib. Komissiya bu paketin mayın 20-də Aİ xarici işlər nazirlərinin görüşündə təsdiqlənməsinə nail olmağa çalışır. Avropa Komissiyası sanksiya siyahısına 60 fiziki və hüquqi şəxsin, həmçinin Rusiya nefti daşıyan 150 tankerin daxil edilməsini təklif edir.
