BAKI, AzerVoice

Ukrayna Prezidenti Volodimir Zelenski, ABŞ ilə faydalı qazıntılar barədə imzalanmış sazişin ratifikasiyasını təsdiqləyib.

AzerVoice xəbər verir ki, bu barədə Ukrayna KİV-i məlumat yayıb.

“Volodimir Zelenski daha əvvəl Ali Rada tərəfindən ratifikasiya edilmiş faydalı qazıntılar haqqında qanun layihəsini imzalayıb” - deyə, məlumatda bildirilib.

Xatırladaq ki, mayın 1-də Nazirlər Kabineti ABŞ ilə imzalanmış bu sazişin tam mətninin ictimaiyyətə təqdim edib. Lakin sənəd ictimai və siyasi dairələrdə ciddi narazılıqlara səbəb olub. Ukraynanın bir çox KİV-ləri və Ali Rada deputatları sazişi təhlil edərək bildiriblər ki, saziş Ukraynanın iqtisadi suverenliyinin bir hissəsinin itirilməsi anlamına gəlir və sənəddə təhlükəsizlik zəmanətləri barədə heç bir konkret müddəa yer almır.

Bundan əlavə, deputatlar əsas sənəddə istinad olunan, lakin parlamentə təqdim olunmayan iki əlavə sənədin mövcudluğuna da etiraz bildiriblər.

Sazişin imzalanmasından sonra Ukraynanın maliyyə naziri Yuliya Sviridenko bəyan edib ki, ABŞ və Ukrayna arasında yaradılacaq ikitərəfli investisiya fonduna Ukrayna yeni rüsumlardan və faydalı qazıntıların hasilatı üçün veriləcək lisenziyaların gəlirlərindən 50 faizini yönəldəcək. Onun sözlərinə görə, fondun idarəçiliyində ABŞ və Ukrayna bərabər səs hüququna malik olacaq.

Saziş Ukraynanın ABŞ qarşısında birbaşa borc öhdəlikləri götürməsini nəzərdə tutmur. İlk 10 il ərzində fond heç bir dividend ödəməyəcək, onun bütün gəlirləri Ukrayna daxilində yenidən investisiya olunacaq. Bu vəsaitlər əsasən faydalı qazıntıların işlənməsi, emalı və infrastrukturun inkişafına yönəldiləcək.