BAKI, AzerVoice

ABŞ Hindistan-Pakistan gərginliyi ilə bağlı açıqlama verib.

AzerVoice xəbər verir ki, ABŞ-ın vitse-prezidenti JD Vance Fox News-a verdiyi açıqlamada Hindistan və Pakistan arasında artan gərginliklə bağlı diqqətçəkən bəyanatla çıxış edib.

O bildirib ki, Vaşinqton gərginliyin tezliklə azalacağına ümid etsə də, bu vəziyyətin “birbaşa ABŞ-ı maraqlandırmadığını” düşünür.

Vance, iki ölkə arasında yaşanan qarşıdurmanın ABŞ-ın nəzarətindən kənarda olduğunu və tərəflərin özləri tərəfindən həll edilməli olduğunu vurğulayıb. O, əlavə edib ki, ABŞ bu məsələdə tərəfləri silahı yerə qoymağa məcbur edə bilməz, lakin diplomatik yollarla prosesi izləməyə davam edəcək.

ABŞ rəsmisi eyni zamanda Hindistan-Pakistan qarşıdurmasının daha genişmiqyaslı regional müharibəyə və ya nüvə qarşıdurmasına çevrilməyəcəyinə ümid etdiklərini də bildirib.

Qeyd edək ki, Hindistan ordusu aprelin 22-də Cammu və Kəşmirin Pahalqam bölgəsində törədilən və 26 nəfərin ölümünə səbəb olan terror aktına cavab olaraq, mayın 6-da Pakistan və Azad Kəşmir ərazisinə raket zərbələri endirib. Yeni Dehli hücum zamanı “terror strukturlarının” vurulduğunu bildirsə də, İslamabad tərəfi mülki hədəflərin vurulduğunu və 31 nəfərin öldüyünü açıqlayıb. Bundan əlavə, Pakistan ordusu Hindistanın bir neçə pilotsuz uçuş aparatını zərərsizləşdirdiyini və bir neçə döyüş təyyarəsini vurduğunu bildirib, lakin bu iddialar Hindistan tərəfindən təsdiqlənməyib.