BAKI, AzerVoice

İran və ABŞ arasında növbəti nüvə danışıqları mayın 3-də Romada keçiriləcək

AzerVoice xəbər verir ki, İranın xarici işlər naziri Abbas Erakçi ABŞ-la nüvə danışıqlarının dördüncü raundunun 3 may tarixində İtaliyanın paytaxtı Romada keçiriləcəyini açıqlayıb.

O, görüşdən əvvəl İngiltərə, Fransa və Almaniya ilə ayrıca məsləhətləşmələr aparacaqlarını bildirib.

Nazir paytaxt Tehranda keçirilən Nazirlər Kabineti iclasından sonra mətbuata verdiyi açıqlamada qeyd edib ki, danışıqların yeri əsas məsələ deyil və görüşlərin harada keçiriləcəyinə ev sahibi Oman qərar verir.

Erakçi Avropa ölkələrinin – İngiltərə, Fransa və Almaniyanın – nüvə danışıqlarındakı təsirinin onların “qəbul etdiyi yanlış siyasətlər” səbəbindən azaldığını vurğulayıb. Buna baxmayaraq, İran tərəfi Avropa ilə əlaqələri saxlamaq niyyətindədir: “Biz bu problemin beynəlxalq səviyyədə anlaşma yolu ilə həllində maraqlıyıq və buna görə də Romada avropalı tərəfdaşlarla görüşməyə hazırıq. Lakin hazırda əsas danışıqlar ABŞ-la aparılır.”

Nazir həmçinin ABŞ-ın danışıqlar prosesi davam etdiyi bir vaxtda İrana qarşı yeni sanksiyalar tətbiq etməsinə münasibət bildirərək, bu addımların mənfi təsir yaradacağını söyləyib.

Qeyd edək ki, 2018-ci ildə ABŞ-ın sabiq prezidenti Donald Tramp ölkəsini İranla imzalanmış nüvə sazişindən birtərəfli qaydada çıxarıb. Lakin son aylarda diplomatik əlaqələr yenidən bərpa olunmağa başlayıb. Trampın mart ayında İran lideri Ayətullah Əli Xameneiyə məktub göndərməsindən sonra, tərəflər Omanın vasitəçiliyi ilə əvvəlcə 12 aprel tarixində Omanda, sonra Romada və daha sonra yenidən Omanda dolayı danışıqlar aparıblar. Hər iki tərəf danışıqlarda müəyyən irəliləyiş əldə olunduğunu bəyan edib.