BAKI, AzerVoice
"Rusiyanın hücumlarını davam etdirməsi məni dərindən məyus edir."
AzerVoice xəbər verir ki, ABŞ Prezidenti Donald Tramp jurnalistlərin suallarını cavablandıran , Ukrayna Prezidenti Vladimir Zelenski ilə son görüşünün müsbət keçdiyini, lakin sülh danışıqları zamanı Rusiyanın hücumlarını davam etdirməsinin onu dərindən məyus etdiyini bildirib.
Tramp açıq şəkildə Rusiya Prezidenti Vladimir Putini tənqid edərək, "Rusiyanın raket hücumlarından çox məyus oldum. " - deyə vurğulayıb. O, Putinə çağırış edərək, "Atəş açmağı dayandır, müqavilə imzala və həyatına davam et" mesajını verib.
Jurnalistlərin “Putinə güvənirsinizmi?” sualına Tramp birbaşa cavab verməyərək, "Bu barədə sizə iki həftə ərzində məlumat verəcəyəm" - deyə cavab verib və məsələyə ehtiyatla yanaşdığını göstərib.
Tramp, eyni zamanda, Vatikanda Papa Fransiskin dəfn mərasimi ərəfəsində Ukrayna lideri ilə keçirdiyi görüşə də toxunub. O, Zelenski ilə münasibətlərinin heç vaxt pis olmadığını qeyd edib və bu dəfəki görüşün daha konstruktiv keçdiyini bildirib. "Düşünürəm ki, Zelenski indi vəziyyəti daha yaxşı anlayır və razılaşmaya daha açıqdır" -deyə əlavə edib.
Ukraynanın silah tələblərinə də münasibət bildirən Tramp, Zelenskinin ABŞ-dan daha çox silah istədiyini, lakin bu məsələdə hələ konkret qərar verilmədiyini bildirib.
İranla bağlı verdiyi açıqlamada isə Tramp, Tehranın nüvə proqramı ilə bağlı danışıqların ümidverici istiqamətdə irəlilədiyini deyib.
Bütün bunlarla yanaşı, ABŞ-ın Ukrayna və Rusiya üzrə xüsusi nümayəndəsi Keyt Kelloq da Londonda keçirilən Ukrayna sülh danışıqlarının ümumilikdə müsbət keçdiyini açıqlayıb. Vatikan görüşündə isə Zelenski Trampla tam və qeyd-şərtsiz atəşkəs məsələsini müzakirə etdiklərini bildirib.
