BAKI, AzerVoice
Zelenski prezident Ərdoğana dəstəyə görə təşəkkür edib.
AzerVoice xəbər verir ki, Ukrayna Prezidenti Vladimir Zelenski Türkiyə Prezidenti Rəcəb Tayyib Ərdoğanla telefon danışığı zamanı ərazi bütövlüyü və suverenliyə göstərilən prinsipial dəstəyə görə təşəkkürünü bildirib.
Zelenski sosial media hesabından verdiyi açıqlamada prezident Ərdoğanla “yaxşı və hərtərəfli” bir görüş keçirdiklərini bildirib. Telefon danışığında əsas müzakirə mövzularından biri mayın 16-da İstanbulda Rusiya ilə aparılan danışıqlar olub.
Ukrayna prezidenti qeyd edib ki, İstanbul görüşündə əldə olunan əsir mübadiləsi mühüm uğur idi, lakin sülhə doğru real addım atmaq üçün atəşkəs vacib nöqtədir.
Zelenski, danışıqların davam etdirilməsi imkanlarının və Ukraynanın hansı şərtlərlə növbəti mərhələdə iştirak edə biləcəyinin də müzakirə edildiyini bildirib. Onun sözlərinə görə, Ukrayna, Rusiya, Türkiyə və ABŞ liderlərinin mümkün dördtərəfli görüşü haqqında da fikir mübadiləsi aparılıb.
Bundan əlavə, Türkiyənin Ukrayna-Cənub-Şərqi Avropa Sammitində iştirakı və bölgədə sülh təşəbbüslərinə verdiyi dəstək də müzakirə olunan məsələlər sırasında olub. Zelenski təşəbbüslərə görə minnətdarlığını ifadə edib.
