BAKI,AzerVoice
İranın xarici işlər naziri Abbas Arakçi Avropa dövlətlərinə xəbərdarlıq edib ki, əgər Beynəlxalq Atom Enerjisi Agentliyinin (İAEA) son hesabatından İran əleyhinə siyasi məqsədlərlə istifadə edilərsə, Tehran buna sərt cavab verəcək. AzerVoice xəbər verir ki, nazir bu barədə İAEA rəhbəri Rafael Qrossi ilə telefon danışığında bildirib. Arakçi Böyük Britaniya, Fransa və Almaniyanı hesabatdan İran əleyhinə addımlar üçün istifadə etməməyə çağırıb.
Qeyd edək ki, İran Xarici İşlər Nazirliyi şənbə günü İAEA hesabatını “siyasi və qeyri-obyektiv” adlandırıb. Həmin hesabatda İranın yüksək səviyyədə zənginləşdirilmiş uran ehtiyatının son üç ayda 50 faiz artdığı və bunun nüvə bombası istehsalına şərait yarada biləcəyi vurğulanıb.
İAEA rəhbəri Qrossi hesabatında agentliyin İranın nüvə proqramının tam sülh məqsədli olduğuna zəmanət verə bilmədiyini bildirib.
ABŞ Prezidenti Donald Tramp isə cümə günü İranın nüvə silahına sahib olmasına icazə verilməyəcəyini vurğulayaraq Tehranla razılaşmanın əldə olunmağa yaxın olduğunu açıqlayıb.
Hazırda ABŞ və İran arasında nüvə proqramı ilə bağlı altıncı danışıqlar raundu gözlənilir. Lakin görüşün vaxtı və yeri hələlik açıqlanmayıb.
