BAKI,
AzerVoice
Türkiyənin Azərbaycandakı fövqəladə və səlahiyyətli səfiri Birol
Akgün ailə institutunun gücləndirilməsinin vacibliyindən
danışıb.
AzerVoice xəbər verir ki, bu gün Xəzər
Universitetində keçirilən “Müasir Dövrdə Ailə Dəyərlərimiz”
mövzusunda elmi-praktiki konfransda çıxış edən Türkiyənin
Azərbaycandakı səfiri Birol Akgün Prezident Rəcəb Tayyib Ərdoğanın
2025-ci ili “Ailə ili” elan etməsinin əhəmiyyətindən danışıb.
Akgün qeyd edib ki, müasir dövrdə ailə dəyərlərinin qorunması, cəmiyyətin davamlı inkişafı üçün olduqca vacibdir. O vurğulayıb ki, təhsilin cəmiyyətin tərəqqisinə, orta təbəqənin möhkəmlənməsinə təsiri böyükdür. Pandemiya dövründə dövlətlərin sosial və beynəlxalq güc göstəricilərinin dəyişdiyini bildirən səfir , “Yalnız iqtisadi və hərbi deyil, humanitar və sosial mənada da böhranlara qarşı müqavimət qabiliyyətimiz önəmlidir.” - deyə qeyd edib.
O, ailədən başlayaraq cəmiyyəti təşkil edən bütün qrupların bir-birinə dəstək göstərməsinin, həmrəylik nümayiş etdirməsinin vacibliyini qeyd edib. “Biz Türkiyədə bu istiqamətdə ciddi səylər göstəririk və məhz buna görə də Rəcəb Tayyib Ərdoğan 2025-ci ili ‘Ailə ili’ elan etdi.” - deyə o bildirib.
Konfransda rəsmi qonaqlarla yanaşı, universitetin professor-müəllim heyəti, tələbələr və media nümayəndələri iştirak ediblər.
Qeyd edək ki, iyunun 10-11-də Türk Dövlətləri Təşkilatına üzv ölkələrin ailə nazirlərinin iştirakı ilə Bakıda növbəti görüş keçiriləcək.
