Bakı. AzerVoice:

Dünən İsrailin Rəfahdakı çadırlara olan amansız hücumu dünya ictimayyəti tərəfindən ciddi tənqidə məruz qaldı.

Azərbaycan Milli Elmlər Akademiyasının Şərqşünaslıq İnstitutunun aparıcı elmi işçisi, Azərbaycan İlahiyyat İnstitutunun dosenti, fəlsəfə üzrə fəlsəfə doktoru Elvüsal Məmmədov bu hücumu öz sosial media hesabından şərh edib. O İsrailin bu qədər cəsarətli davranmasının səbəblərini şərh edib. Alimin həmin şərhini təqdim edirik:

''Məhz ərəb liderlərinin hərəkətsizliyi, aralarında güclü şəxsiyyətli birinin olmamağı dünən Rəfəhdə qadın və uşaqların olduğu düşərgənin bombalanması və oradakı hər kəsin diri-diri yanmasına gətirib çıxarmışdır. Misirli akademik Əbdülvəhhab Məssirinin (1938-2008) təbirincə desək: "İsraili güclü edən iki amil mövcuddur: a) qeyri-məhdud xarici dəstək (ABŞ-ın dəstəyi); b) ərəblərin qeyri-məhdud yoxluğu, qeybəçəkilmişliyi".

Kadrlara baxmaq olmur, yanmış uşaq cəsədləri ürəyə dağ çəkir… Amma artıq dünya - vicdanlı insanlar susmurlar; Birləşmiş Avropanın üç dövləti Fələstini müstəqil dövlət kimi tanıyıb.

ABŞ-yə gəlincə, insan hüquqları, beynəlxalq ədalət və söz azadlığının bu "dahi" təmsilçisi və müdafiəçisinin maskası cırılıb. Böyük Fransa inqilabı zamanı deyilən söz bu gün ABŞ üçün yerinə düşür: "İnqilab öz oğullarını yeyir".