Bakı,
AzerVoice
İsrail mətbuatı PKK-nın silahlarını yerə qoymasının və təşkilatın
dağılmasının İsrailin Suriyadakı maraqlarına ciddi təsir edə
biləcəyini yazıb.
AzerVoice xəbər verir ki, Haaretz qəzeti bu prosesin Suriya və Türkiyə arasında güc balansını dəyişdirəcəyini və İsrailin bölgədəki mövcudluğuna meydan oxuya biləcəyini vurğulayıb.
“Əgər Moskva yerinə Türkiyə Suriya hava məkanına nəzarət etsə,
İsrailin bu ölkədəki əməliyyatları çətinləşə bilər”, – deyə
təhlildə bildirilib.
İsrail mətbuatı PKK lideri Abdullah Öcalanın təşkilatın silahı yerə
qoyması çağırışını bölgədə siyasi və hərbi vəziyyəti dəyişdirən
amil kimi qiymətləndirib. The Jerusalem Post qəzeti Türkiyənin
PKK-nın çağırışa məhəl qoymayan hissəsinə qarşı genişmiqyaslı
əməliyyatlara başlaya biləcəyini yazıb.
"PKK/YPG-nin ABŞ-ın dəstəyini itirməsi onu Suriya hökuməti ilə razılaşmağa məcbur edə bilər", – deyə Yedioth Ahronoth qəzeti qeyd edib.
Kanal 14 isə hadisələrin Şimali İraq və Suriyaya böyük təsir göstərəcəyini və bölgədə yeni mərhələnin başlandığını vurğulayıb.
İsrail mətbuatında PKK-nın dağılmasının Türkiyənin Suriyanın şimalındakı təhlükəsiz bölgələrdən çəkilməsinə səbəb ola biləcəyi və bunun İsrailin Suriyanın cənubundakı mövqeyini beynəlxalq təzyiqlər qarşısında zəiflədə biləcəyi bildirilib.
Bundan əlavə, DEM Partiyasının nümayəndə heyəti Abdullah Öcalanın PKK-nın özünü buraxması və silahı yerə qoyması çağırışını oxuyub, bu isə bölgədə yeni siyasi proseslərin başlanğıcı kimi qiymətləndirilir.
