BAKI, AzerVoice, Orxan Qədirzadə
Suriyanın şimal-şərqində yerləşən Həsəkə vilayətinin Şəddadi bölgəsində YPG/SDQ-nin nəzarətində olan həbsxanadan İŞİD üzvlərinin azad edilməsi təhlükəsizliklə bağlı ciddi narahatlıqlar yaradıb.
AzerVoice xəbər verir ki, adının açıqlanmasını istəməyən Suriya hökumət rəsmisi YPG/SDQ-nin Şəddadi həbsxanasından İŞİD üzvlərini buraxaraq bu məsələni bölgədə daha çox xaos və terror yaratmaq üçün alətə çevirdiyini bildirib. Rəsmi şəxs bu addımın həm daxili təhlükəsizlik, həm də regional sabitlik üçün ciddi risk daşıdığını vurğulayıb.
Rəsmiyə görə, danışıqlar prosesi davam etdiyi halda, xüsusilə Hol düşərgəsi ilə bağlı əvvəlcədən heç bir koordinasiya aparılmadan YPG/SDQ-nin mövqelərindən çəkilməsi müşahidə olunub. Bildirilib ki, bu proses nə Suriya tərəfi, nə ABŞ, nə də digər beynəlxalq tərəfdaşlarla razılaşdırılmayıb.
Suriya hökumətinin nümayəndəsi qeyd edib ki, YPG/SDQ indiyədək əsas və təhlükəsiz obyekt hesab edilən Şəddadi həbsxanasından çıxmaqdan imtina edib. Buna baxmayaraq, ilk gündən etibarən İŞİD-lə mübarizə aparan beynəlxalq koalisiya tərəfdaşları, xüsusilə ABŞ ilə alternativ planlar üzərində iş aparılıb. Həmin planlara İŞİD üzvlərinin koalisiya nəzarətində olan ərazilərə köçürülməsi də daxil olub.
Rəsmi şəxs vurğulayıb ki, bu məsələ aylardır gündəmdədir və ABŞ tərəfi də vəziyyətin mürəkkəbliyinə, geniş ərazilərin istismar riski ilə üzləşə biləcəyinə diqqət çəkib. Bu çərçivədə İraq hökuməti ilə də müzakirələrin aparıldığı bildirilib.
Hol düşərgəsinin İraq hökumətinə və Şimali İraqa açılan sərhəd keçidlərinə yaxınlığı xüsusi təhlükə mənbəyi kimi qiymətləndirilir. Suriya tərəfi düşərgənin və ümumilikdə bölgənin təhlükəsizliyinin təmin olunması üçün beynəlxalq koalisiya tərəfdaşları ilə məsləhətləşmələrin davam etdiyini açıqlayıb.
Suriya hökuməti rəsmisi bildirib ki, rəsmi Dəməşq həm həbsxanalar, həm də düşərgələrlə bağlı bu mürəkkəb dosyeni idarə etmək üçün hüquqi, humanitar və təhlükəsizlik aspektlərini əhatə edən bütün planlara malikdir. Cinayəti sübuta yetirilən şəxslərin məsuliyyətə cəlb ediləcəyi, digərləri üçün isə reabilitasiya proqramlarının tətbiq olunacağı qeyd edilib.
Eyni zamanda, ABŞ-ın vasitəçiliyi ilə əldə olunan atəşkəsdən sonra verilmiş dörd günlük müddət ərzində YPG/SDQ tərəfindən pozuntuların davam etdiyi bildirilib. Rəsmiyə görə, bu pozuntular mülki şəxslərə və Suriya ordusuna qarşı hücumlar, mövqelərin möhkəmləndirilməsi, qanunsuz saxlamalar və yerli əhali üzərində təzyiqlər şəklində özünü göstərib.
Suriya hökuməti sahədə əsas prioritetin əsas yolların və şəhər girişlərinin təhlükəsizliyinin təmin olunması olduğunu vurğulayıb və hərbi əməliyyatların bitdiyi ərazilərdə məsuliyyətin təhlükəsizlik və polis qüvvələrinə verildiyini bildirib. Rəsmi şəxs YPG/SDQ-nin də əldə olunmuş razılaşmalara əməl edəcəyinə ümid etdiklərini qeyd edib.