BAKI, AzerVoice, Orxan Qədirzadə

İsrail həbsxanalarında saxlanılan fələstinli məhbuslarla bağlı vəziyyətin kəskinləşməsi fonunda genişmiqyaslı iğtişaş ehtimalı ilə bağlı rəsmi xəbərdarlıq edilib.

AzerVoice-un məlumatına görə, İsrail Həbsxana Xidmətinin rəhbəri Kobi Yaakobi bu barədə ölkə parlamentində – Knessetin Milli Təhlükəsizlik Komitəsinin iclasında çıxışı zamanı bildirib.

Onun sözlərinə görə, fələstinli məhbusların saxlanıldığı həbsxanalarda vəziyyətin gərginləşməsi ciddi eskalasiya riski yaradır. Yaakobi qeyd edib ki, qurum təxminən iki ildir mümkün iğtişaş ssenarilərinə, o cümlədən kameraların yandırılması ilə müşayiət olunan hadisələrə hazırlaşır.

İsrail dövlət televiziya kanalı KAN-ın məlumatına əsasən, Yaakobi komitə üzvlərinə həbsxanalarda “ciddi hadisələrin baş verə biləcəyi” ilə bağlı xəbərdarlıq edib və təhlükəsizlik baxımından risklərin artdığını vurğulayıb.

Həbsxana Xidmətinin rəhbəri bildirib ki, “təhlükəsizlik məhbusları” adlandırılan fələstinli saxlanılan şəxslər azadlığa çıxmaq ümidlərini böyük ölçüdə itiriblər. Onun sözlərinə görə, 2023-cü ilin noyabrında azadlığa çıxacaqlarına inanan məhbuslar artıq gələcəyə dair hər hansı gözlənti daşımırlar.

Digər tərəfdən, həbsxana komandanı Avixay Ben Hamu ötən il məhbuslar tərəfindən hazırlandığı iddia edilən kamera planlarının aşkarlanaraq müsadirə edildiyini bildirib.

İnsan hüquqları təşkilatları, məhbusların vəkilləri və zərərçəkmişlərin ifadələri İsrail həbsxanalarında saxlanılan fələstinlilərə qarşı sistematik zorakılıq və qeyri-insani rəftar hallarının mövcudluğuna dair iddiaları gücləndirir.

Məlumatlara görə, fələstinli məhbusların vəziyyəti xüsusilə ifrat sağçı siyasətçi İtamar Ben-Qvirin Milli Təhlükəsizlik naziri təyin edilməsindən sonra daha da ağırlaşıb. Bildirilir ki, aclıq, tibbi xidmətlərdən məhrumetmə, fiziki zorakılıq və cinsi istismar halları sistematik xarakter alıb.