BAKI, AzerVoice, Orxan Qədirzadə

Türkiyə Silahlı Qüvvələrinin Baş Qərargah rəisi Selçuk Bayraktaroğlu Dəməşqdə Suriya müdafiə rəhbərliyi ilə yüksək səviyyəli görüşlər keçirib. Rəsmi dəvət əsasında baş tutan səfər çərçivəsində o, Suriya müdafiə naziri Murhaf Əbu Kasra və Baş Qərargah rəisi Əli Nurəddin Nasan ilə təhlükəsizlik və koordinasiya məsələlərini müzakirə edib.

AzerVoice xəbər verir ki, məlumat Türkiyə Baş Qərargahının rəsmi sosial media hesabında paylaşılıb.
Bayraktaroğluna səfərdə Baş Qərargah rəisinin 2-ci müavini Levent Ergün də müşayiət edib.

Görüşlərdən sonra tərəflər birgə Türkiyə–Suriya əməliyyat mərkəzində vəziyyətə dair yerində araşdırmalar aparıblar. Bayraktaroğlu həmçinin Türkiyənin Dəməşq səfiri Burhan Köroğlu və hərbi attaşelik heyəti ilə də görüşüb.

Səfər çərçivəsində nümayəndə heyəti Suriya İnqilabı Hərbi Sərgisini ziyarət edərək sərgidə nümayiş olunan yeni hərbi texnikalar və sahədə mövcud vəziyyətlə bağlı məlumat əldə edib.

Məlumata görə, 10 martda Suriya hökuməti ilə SDQ arasında razılaşdırılan inteqrasiya planı sahədə real nəticə verməyib. SDQ-nin ilin sonuna qədər dövlət strukturlarına tam qoşulması ilə bağlı öhdəliklərin hazırda icra olunmadığı bildirilir.