BAKI, AzerVoice, Orxan Qədirzadə
Noyabr ayında Türkiyənin elektrikli avtomobil bazarında yerli istehsalçı Togg — T10X və T10F modelləri ilə satış lideri olub.
AzerVoice xəbər verir ki, bu barədə Avtomobil Dilerləri və Mobillik Assosiasiyasının (ODMD) hesabatından məlumat verilib.
Yanvar-noyabr dövründə Türkiyədə avtomobil satışları illik müqayisədə 10,96% artaraq 938 177 ədədə çatıb. Yüngül kommersiya nəqliyyat vasitələrinin satışı 7,13% artımla 238 603 ədəd təşkil edib. Beləliklə, ümumi satış həcmi 1,1 milyon ədədə yüksəlib ki, bu da ötən ilin eyni dövrü ilə müqayisədə 10,16% daha çoxdur.
Noyabr ayında satışlar 9,82% artaraq 132 984 ədədə yüksəlib. Bunun 104 795-i minik avtomobilləri, 28 189-u isə yüngül kommersiya nəqliyyat vasitələridir.
Elektrikli nəqliyyat vasitələri seqmentində Togg T10F və T10X ölkə üzrə ən çox satılan modellər olub. T10F isə ümumi avtomobil bazarının ilk onluğuna daxil olaraq 10-cu yeri tutub. Ay ərzində 2366 T10F və 1896 T10X satılıb — ümumilikdə 4235 ədəd.
Elektromobillər üzrə Tesla Model Y 2535 satışla birinci olub. Onu KG Mobility (1209), Opel (771) və Volvo (738) izləyib.
Ötən ay Türkiyənin ümumi avtomobil bazarında ən çox satılan modellər Renault Clio (4468), Renault Megane Sedan (4110) və BYD Seal U (3562) olub. Togg T10X siyahıda 15-ci yeri tutub.
Togg 2025-ci ilin sentyabrında Almaniya bazarına daxil olaraq Avropada debüt edib. T10X və T10F modellərinin ilk çatdırılmaları Ştutqart şəhərinə edilib. Hər iki model 8 sentyabrda Münhendə keçirilən IAA Mobility sərgisində təqdim olunub, 29 sentyabrdan isə Almaniyada ön sifarişə açılıb.