BAKI, AzerVoice, Orxan Qədirzadə

Misirin xarici işlər naziri Bədr Əbdülattı və Rusiyanın xarici işlər naziri Sergey Lavrov arasında keçirilən telefon danışığında Sudan, Suriya, Livan və Qəzzadakı proseslər, eləcə də ikitərəfli əlaqələr ətraflı şəkildə müzakirə olunub.

AzerVoice xəbər verir ki, Misir XİN-in məlumatına görə, tərəflər iqtisadi və ticarət sahələrində artan dinamikanı qeyd edərək, xüsusilə Dabaa nüvə elektrik stansiyasının gedişatı və Rusiyanın Misirdəki investisiyalarının genişləndirilməsi ilə bağlı əməkdaşlığı qiymətləndiriblər. Nazir Əbdülattı iki ölkə arasında strateji tərəfdaşlığın bütün istiqamətlər üçün çərçivə rolunu oynadığını vurğulayıb.

Nazir həmçinin BMT Təhlükəsizlik Şurasının 2803 saylı qətnaməsinin icrası, Qəzzada ABŞ prezidentinin sülh planının ikinci mərhələsinə keçid və beynəlxalq sabitləşdirmə qüvvəsinin mandatının gücləndirilməsi zərurətinə diqqət çəkib.

Danışıq zamanı Misirin Sudan üzrə Qvad mexanizmi çərçivəsində səyləri, ölkənin suverenliyi və bütövlüyünün qorunması, həmçinin Livanın təhlükəsizlik və sabitliyinin dəstəklənməsi mövqeyi bir daha xatırladılıb. Əbdülattı Suriyanın ərazi bütövlüyünə hörmət edilməsini, xarici müdaxilələrin yolverilməz olduğunu və suriyalıların gözləntilərinə uyğun siyasi prosesin aktivləşdirilməsini xüsusi qeyd edib.

Nazirlər həmçinin İranın nüvə proqramı, bölgədə gərginliyin azaldılması, diplomatik danışıq imkanlarının genişləndirilməsi və etimadın bərpası yollarını müzakirə ediblər.

Telefon danışığı çərçivəsində Ukrayna müharibəsi də gündəmdə olub. Misir tərəfi böhranların yalnız dialoq və diplomatik vasitələrlə həll edilməsinin vacibliyini vurğulayıb.