Bakı, AzerVoice, Orxan Qədirzadə

Suriya Ərəb Respublikası Mərakeşin Marakeş şəhərində keçirilən 93-cü İnterpol Baş Assambleyasında beynəlxalq cinayətkarlığa qarşı mübarizə sahəsində əməkdaşlıq məsələlərini müzakirə edib.

AzerVoice xəbər verir ki, Suriya daxili işlər nazirinin təhlükəsizlik məsələləri üzrə müavini general-mayor Əbdülqadir Tahhan və İnterpolun prezidenti general-mayor Əhməd Nasser Əl-Rəisi təhlükəsizlik və prokurorluq sahəsində əməkdaşlığın genişləndirilməsi, o cümlədən mütəşəkkil və transmilli cinayətkarlıq, eləcə də kiber cinayətlərə qarşı birgə fəaliyyət mexanizmlərini müzakirə ediblər.

Tərəflər ölkələr arasında məlumat mübadiləsinin sürətləndirilməsi üçün İnterpolun rəqəmsal platformalarının, eləcə də süni intellektlə idarə olunan məlumat emalı sistemi və virtual analitik assistent kimi alətlərin tətbiqini nəzərdən keçiriblər.

Görüşdə, həmçinin Suriya Daxili İşlər Nazirliyi əməkdaşları üçün peşə hazırlığının artırılması, potensialın gücləndirilməsi və təhlükəsizlik sahəsində qabaqcıl təlim proqramlarının genişləndirilməsi imkanları müzakirə olunub.

Qeyd edək ki, 93-cü İnterpol Baş Assambleyası üzv ölkələrin nümayəndə heyətlərini bir araya gətirərək qlobal cinayət tendensiyalarını, beynəlxalq polis əməkdaşlığının gücləndirilməsini və texnoloji yeniliklərin hüquq-mühafizə sistemlərinə təsirini qiymətləndirir.

Marakeşdəki iclasda xüsusilə texnoloji çağırışlar, sərhədlərarası cinayət şəbəkələri və məlumat mübadiləsinin daha da təkmilləşdirilməsi məsələləri diqqət mərkəzində olub.