BAKI, AzerVoice, Nailə Babazadə

İsrail ordusunun Qəzza zolağında atəşkəs qüvvəyə minsə də, evlərinə qayıtmağa çalışan fələstinlilərə atəş açması nəticəsində 3 nəfər həlak olub.

AzerVoice xəbər verir ki,Fələstinin rəsmi WAFA xəbər agentliyinin məlumatına görə, İsrail əsgərləri Qəzzə şəhərinin şimalında, evlərinə dönmək istəyən mülki şəxsləri hədəf alıb.

Məlumata əsasən, İsrail ordusu atəşkəs razılaşmasına baxmayaraq, şəhərin Əş-Şucaiyyə məhəlləsində evlərini görməyə gələn fələstinlilərə pilotsuz uçuş aparatlarından (PUA) atəş açıb. Hadisə nəticəsində 3 nəfər həyatını itirib.

WAFA əlavə edib ki, İsrailin əvvəlki hücumları zamanı yaralanan daha 2 fələstinli də bu gün həyatını itirib.

Xatırladaq ki, ABŞ Prezidenti Donald Tramp oktyabrın 9-da Misirdə aparılan danışıqlar çərçivəsində İsrail və HƏMAS-ın Qəzzədə atəşkəs planının ilk mərhələsini təsdiqlədiyini açıqlamışdı.

Razılaşma Misirdə imzalandıqdan sonra İsrail hökumətinin təsdiqi ilə 10 oktyabrda qüvvəyə minib.

Sazişə əsasən, İsrail ordusu “sarı xətt” adlandırılan bölgəyə geri çəkildikdən sonra, atəşkəs həmin gün saat 12:00-da qüvvəyə minmişdi.