BAKI,AzerVoice, Fərid Mikayılov

Hələbdə keçirilən azad seçkilərdə Türkmən xalqı ilk dəfə öz iradəsini nümayiş etdirdi.

Suriya tarixində ilk dəfə olaraq Türkmənlər azad və ədalətli seçkilərdə üç millət vəkili ilə parlamentdə təmsil olunmağa nail olublar. Uzun illər rejimin nəzarətində keçirilən, müxalifətə yer verilməyən seçkilərin əksinə olaraq bu dəfə xalqın həqiqi iradəsi sandığa əks olunub.

Suriya Böyük Xalq Məclisinə keçirilən son seçkilərdə Hələb mərkəzindən namizəd olan vəkil Mehid Seyfəttin İsa, 190 nümayəndənin səsini qazanaraq Hələb üzrə 2-ci sıradan Türkmən millət vəkili seçilib.

Tanınmış və köklü bir Türkmən ailəsinə mənsub olan Mehid Seyfəttin İsa, həm Hələbdə, həm də ümumilikdə Suriyada geniş nüfuza malikdir. Onun ailəsi tarixən Fransa işğalına qarşı mübarizədən başlayaraq Bəşşar Əsəd rejiminin sona çatmasına qədər müxtəlif mərhələlərdə milli mübarizədə önəmli rol oynayıb.

Bu qələbə, sadəcə fərdi uğur deyil, Suriya Türkmən xalqının iradəsinin, ümidinin və qətiyyətinin simvolu kimi dəyərləndirilir.

Türkmən nümayəndələri seçki nəticələrini böyük məmnuniyyətlə qarşılayaraq aşağıdakı açıqlamanı yayıblar:

“Hələb millətvəkili seçkilərinin başa çatması ilə birlikdə xalqın iradəsi nəticəsində hörmətli vəkil Mehid İsanın Hələb millətvəkili seçildiyini məmnuniyyətlə öyrəndik. Bu mühüm qələbə münasibətilə onu səmimi şəkildə təbrik edir, Suriya Türkmən xalqının səsi və təmsilçisi olacağına inanırıq.”

Təxminən 60 ildən sonra xalqın azad iradəsi ilə keçirilən bu seçkilər, Suriya üçün demokratik gələcəyə doğru atılmış mühüm addım kimi qiymətləndirilir. Türkmən dairələri, qarşıdakı mərhələdə prezident kvotası ilə təyin olunacaq deputatlar arasında da Türkmən nümayəndələrinin yer alacağına ümid edirlər.