BAKI, AzerVoice, Nərmin Ağayeva
İsrail ordusunun Qəzza zolağına təşkil etdiyi son hücumlarda ən azı 66 fələstinli həyatını itirib, minlərlə insan isə didərgin düşüb. Qəzzadakı Əl-Əqsa Şəhidləri Xəstəxanasında elektrik kəsintisi səbəbindən səhiyyə sistemi çökmə təhlükəsi ilə üzləşib.
AzerVoice xəbər verir ki, İsrail ordusunun Qəzza zolağında dünən səhərdən etibarən həyata keçirdiyi hava və quru hücumları nəticəsində 66 fələstinli həlak olub, çoxlu sayda insan yaralanıb. Hücumlar Qəzza şəhərinin mərkəzindəki Vahdet küçəsində mülki yığıncaqları, şimaldakı Şeyx Radvan və Zarqa bölgələrini, həmçinin şimal-qərbdəki Zikim bölgəsində humanitar yardım gözləyən fələstinliləri hədəf alıb. Nusraerat Qaçqınlar Düşərgəsində bir mülki evə endirilən hava zərbəsi də 5 fələstinlinin ölümünə səbəb olub.
Qəzzadakı Əl-Əqsa Şəhidləri Xəstəxanası elektrik kəsintisi səbəbindən böyük bir böhranla üzləşir. Xəstəxananın açıqlamasına görə, əsas generatorlar ağır istifadə və şərait səbəbindən dəfələrlə sıradan çıxıb, hazırda yalnız iki aşağı tutumlu generatorla fəaliyyət göstərir. Bu, əməliyyat otaqları, reanimasiya və neonatal bölmələr kimi kritik sahələrin ehtiyaclarını ödəmək üçün yetərli deyil. Xəstəxana administrasiyası 400 kilovolt amper gücündə böyük bir generatorun təcili olaraq təmin edilməsinə çağırış edib.
Fələstinin Səhiyyə Nazirliyi, İsrailin sərhəd keçidlərini bağlaması və ehtiyat hissələrinin idxalına mane olması səbəbindən generatorların təmirinin mümkün olmadığını, dərman və tibbi avadanlıq çatışmazlığının isə səhiyyə sistemini iflic vəziyyətinə gətirdiyini bildirib. İnsan haqları qrupları və BMT agentlikləri də Qəzzada səhiyyə sektorunun tamamilə çökmə riski ilə bağlı dəfələrlə xəbərdarlıq ediblər.
Qeyd edək ki, 7 oktyabr 2023-cü ildən bəri İsrailin ABŞ-ın dəstəyi ilə Qəzzaya təşkil etdiyi hücumlarda 63,025 fələstinli həyatını itirib, 159,490 nəfər yaralanıb, 9,000-dən çox insan isə itkin düşüb. Əksəriyyəti qadın və uşaq olan qurbanlar arasında aclıq səbəbindən həlak olanların sayı da 121-i uşaq olmaqla 322 nəfərə çatıb.
Fələstin hökuməti və insan haqları təşkilatları İsrailin tibb işçilərini, xəstəxanaları və təcili yardım maşınlarını hədəf aldığını, bunun səhiyyə sisteminə qəsdən ziyan vurmaq məqsədi daşıdığını bildirir. Beynəlxalq ictimaiyyətə humanitar dəhlizlərin açılması və Qəzzaya yardımın çatdırılması üçün təcili tədbir görülməsi çağırışı edilib.