BAKI, AzerVoice, Səməd Əyyubov
Türkiyədən öz ölkələrinə könüllü şəkildə geri dönən suriyalıların sayı 450 min 169 nəfərə çatıb.
AzerVoice xəbər verir ki, bu barədə Türkiyənin daxili işlər naziri Ali Yerlikaya məlumat verib.
Nazir, 2011-ci ildə Bəşşar Əsəd rejimindən qaçaraq Türkiyəyə sığınan suriyalıların hər zaman yanında olduqlarını və bu dəstəyin davam edəcəyini vurğulayıb. Yerlikaya qeyd edib ki, ötən ilin 8 dekabrından etibarən Suriyaya qayıdış müraciətləri artıb və həmin dövrdən indiyədək 450 min 169 nəfər könüllü şəkildə vətəninə dönüb.
Qeyd edək ki, indiyədək ümumilikdə 1 milyon 190 min 172 suriyalı ölkəsinə geri qayıdıb. Əgər 2022-ci ildə Türkiyədə müvəqqəti qoruma altında olan suriyalıların sayı 3 milyon 535 min 898 nəfər idisə, cari ilin avqust ayına olan göstəriciyə görə bu rəqəm 2 milyon 506 min 740 nəfərə qədər azalıb.