BAKI, AzerVoice, Nərmin Ağayeva
HƏMAS İsrailin Qəzzadakı və region ölkələrinə qarşı aqressiyasını onun ekspansionist siyasətinin təzahürü kimi qiymətləndirib.
AzerVoice xəbər verir ki, HƏMAS-ın yazılı açıqlamasında İsrailin Qəzza zolağında və region ölkələrində həyata keçirdiyi hücumlar “sionist varlığın ərəb və islam ölkələri üçün yaratdığı təhlükənin sübutu” kimi təsvir edilib. Açıqlamada vurğulanıb ki, İsrailin Yəmən, Suriya və Livana qarşı hücumları, eləcə də Qəzzada Fələstin xalqına qarşı davam edən təcavüzləri sionistlərin terrorçu və ekspansionist mahiyyətini üzə çıxarır. Xüsusilə, İsrail Baş naziri Benyamin Netanyahunun “Böyük İsrail” layihəsinə sadiqliyi və ərəb torpaqlarını mənimsəmək siyasəti bu təcavüzlərin əsas motivi kimi qeyd olunub.
HƏMAS beynəlxalq ictimaiyyəti, Birləşmiş Millətlər Təşkilatını və ərəb-islam ölkələrini İsrailin Fələstin xalqına və regionun digər xalqlarına qarşı cinayətlərini dayandırmaq üçün təcili tədbirlər görməyə çağırıb.
Qeyd edək ki, İsrailin “Böyük İsrail” vizyonu, xüsusən Netanyahunun və ifrat sağçı nazir Bezalel Smotrichin açıqlamaları ilə aktuallaşıb. Smotrich avqustun 13-də Şərqi Qüdsdə “E1” layihəsi ilə fələstinlilərdən ələ keçirilən ərazilərdə yaşayış məntəqələrinin genişləndirilməsini planlaşdırdığını bəyan edib. Bu siyasət, sionist revizionist hərəkatının banisi Zeev Jabotinsky tərəfindən irəli sürülən və indiki İsrail, Qəzza, İordan çayının qərb sahili və İordaniya ərazilərini əhatə edən “Böyük İsrail” ideologiyasına əsaslanır.