BAKI, AzerVoice, Səməd Əyyubov
Təl-Əvivdə Qəzza müharibəsinin davam etməsinə qarşı və girovların azad olunması tələbi ilə keçirilən etiraz aksiyasının iştirakçısı saxlanılıb.
AzerVoice xəbər verir ki, İsrail Polisinin verdiyi məlumata görə, onun üzərindən tüstü qumbarası götürülüb.
Bundan əlavə, bir neçə nümayişçiyə avtomobil yolunu bağlayaraq hərəkətə mane olduqları üçün cərimə yazıldığı bildirilib. Polis bəyan edib ki, “əsas etiraz yerlərində ictimai asayişin pozulmasına yol verməmək üçün gücləndirilmiş rejimdə fəaliyyət göstərir”.
Bir sıra qeyri-hökümət təşkilatları avqustun 26-nı girovların azad edilməsi və Qəzzadakı müharibənin dayandırılması uğrunda “mübarizə günü” elan ediblər.
Aksiyalar yerli vaxtla səhər saat 06:29-da başlayıb. Bu vaxt 2023-cü il oktyabrın 7-də HƏMAS-ın İsrailə hücumunun başlama saatı ilə üst-üstə düşür. Həmin hücum zamanı sərhəd yaşayış məntəqələrinin sakinləri qətlə yetirilmiş, 250-dən çox insan girov götürülmüşdü.
Nümayişçilər bir neçə dəfə Təl-Əvivin şərqindəki Ayalon şossesini və ona bitişik küçələri bağlayıblar. Onlar Təl-Əvivlə Qüdsü birləşdirən 1 nömrəli magistralı, həmçinin İsrailin mərkəzindəki 2, 443 və 531 nömrəli yolları kəsərək təkərləri yandırıblar. Axşam saatlarında isə Təl-Əvivin mərkəzində girovların azad olunması və müharibəyə son qoyulması tələbi ilə yeni aksiya keçirilməsi planlaşdırılır.
Xatırladaq ki, avqustun 17-də on minlərlə israilli Təl-Əvivin mərkəzində kütləvi mitinq keçirərək hökumətdən girovların azad olunması üçün razılaşma əldə etməyi tələb etmişdi. Həmin gün müxtəlif aksiyalar zamanı ictimai asayişi pozduqları üçün polis 38 nəfəri saxlamışdı.
