BAKI, AzerVoice, Nərmin Ağayeva

İsrail ordusu Qəzzanı üç briqada ilə mühasirəyə alıb, bölgədə humanitar böhran dərinləşir.

AzerVoice xəbər verir ki, Qəzza rəsmiləri İsrailin quru əməliyyatlarının ilk mərhələsinə başladığını açıqlayıb. Ordunun Zeytun və Cəbəliyyə məhəllələrinə hücum etdiyi, Qəzza şəhərini isə üç hərbi briqada ilə mühasirəyə aldığı bildirilib. Hava və artilleriya zərbələri ilə müşayiət olunan əməliyyatlar nəticəsində fələstinlilər bölgəni tərk etməyə çalışır.

BMT və beynəlxalq təşkilatlar xəbərdarlıq edərək, əməliyyatların fəlakətli nəticələrə gətirib çıxaracağını vurğulayıb. Baş katib Antonio Quterreş dərhal atəşkəs çağırışı edib. Bununla yanaşı, İsrail Müdafiə Nazirliyinin təsdiqlədiyi plana əsasən, yaxın günlərdə əməliyyatların genişləndirilməsi nəzərdə tutulur.

HƏMAS da İsraili dinc əhaliyə qarşı amansız hücumlarda ittiham edib. Qəzzadakı Mülki Müdafiə Agentliyi isə Zeytun və Sabra bölgələrində vəziyyətin xüsusilə ağır olduğunu, son hücumlarda azı 25 nəfərin, o cümlədən Şati qaçqın düşərgəsindəki bir ailənin üzvlərinin öldüyünü açıqlayıb.

Qeyd edək ki, İsrail hökuməti sentyabrın əvvəlində əlavə 60 min ehtiyat hərbçini səfərbər etməyi planlaşdırır. Baş nazir Benyamin Netanyahu isə Qəzzada HƏMAS-ın “son qalalarının” ələ keçirilməsi üçün əməliyyatların davam etdiriləcəyini bəyan edib.