BAKI, AzerVoice, Nərmin Ağayeva

İsrailin Qəzzanı işğal planı uğursuz olacaq.

AzerVoice xəbər verir ki, HƏMAS İsrailin Qəzzanı işğal etmək üçün başlatdığı və “Gideonun arabaları 2” adlandırılan planın əvvəlkilər kimi iflasa uğrayacağını bəyan edib.

Təşkilatın açıqlamasında bildirilib ki, İsrailin müdafiə naziri Yisrael Katz tərəfindən təsdiqlənən plan 22 aydan çoxdur davam edən hərbi əməliyyatları dərinləşdirəcək və vasitəçilərin atəşkəs və əsir mübadiləsinə dair təşəbbüslərinə əhəmiyyət verilməyəcək. HƏMAS həmçinin İsrail hökumətini günahsız mülki şəxslərə qarşı amansız müharibəni davam etdirməkdə ittiham edib.

Açıqlamada Baş nazir Benyamin Netanyahunun vasitəçilərin atəşkəs təklifinə cavab verməməsi də tənqid olunub. HƏMAS bunun İsrailin əsirlərin qaytarılması məsələsində ciddi olmadığını göstərdiyini bildirib.

Xatırladaq ki, İsrail Təhlükəsizlik Kabineti avqustun 8-də Qəzza şəhərinin işğalı planını təsdiqləyib. Müdafiə naziri Yisrael Katz və Baş nazir Netanyahu plana əsasən əvvəlcə bir milyonadək fələstinlinin cənuba köçürüləcəyini, şəhərin mühasirəyə alınacağını və daha sonra intensiv hücumlarla işğal ediləcəyini açıqlayıblar.

Qeyd edək ki, HƏMAS avqustun 18-də Misir və Qətərin atəşkəs və əsir mübadiləsinə dair təklifini qəbul etdiyini açıqlayıb. Lakin İsrail tərəfi bu təklifə hələ cavab verməyib.