BAKI, AzerVoice, Səməd Əyyubov – May ayından bəri Qəzza zolağında İsrailin yardım paylama məntəqələrində və BMT-nin yardımlarının keçdiyi yollarda humanitar yardım gözləyən 1 500 nəfər öldürülüb.

AzerVoice xəbər verir ki, bu barədə Birləşmiş Millətlər Təşkilatının (BMT) Baş katibinin müavini Farhan Haq mətbuat brifinqində bildirib.

O qeyd edib ki, Qəzzada hələ də ərzaq əldə etməyə çalışan insanlar öldürülür. Onun sözlərinə görə, mart ayından bəri bölgəyə sığınacaq materiallarının girişinə icazə verilməyib, ötən həftə müəyyən miqdarda ərzaq keçidinə icazə verilsə də, bunlar əhalinin ehtiyaclarını qarşılamır və aclıq xüsusilə uşaqlar arasında dəhşətli həddə çatıb.

Haq, BMT və tərəfdaşlarının təcili atəşkəs çağırışını təkrarladığını, həmçinin ehtiyac sahiblərinə humanitar yardım və kommersiya məhsullarının maneəsiz çatdırılması üçün dərhal tədbir görülməsinin vacibliyini vurğulayıb.

Qeyd edək ki, Qəzza zolağında xüsusilə uşaqlar arasında aclıqdan ölənlərin sayı artmaqdadır. Qəzzanın Səhiyyə Nazirliyi Qəzzada aclıqdan ölənlərin sayının 93-ü uşaq olmaqla 180-ə yüksəldiyini açıqlayıb.

Yerli və beynəlxalq qurumlar bildirirlər ki, İsrail “aclıq və susuzluqdan silah kimi” istifadə edir.