BAKI, AzerVoice, Səməd Əyyubov – HƏMAS Qəzza zolağındakı münaqişənin hərtərəfli həlli və anklavda saxlanılan bütün israilli girovların azad edilməsi məqsədilə danışıqlar aparmağa hazırdır.

AzerVoice xəbər verir ki, bu barədə "The National" qəzeti mənbələrə istinadən məlumat yayıb.

Məlumata görə, ABŞ sözügedən sənəd layihəsini İsrail, həmçinin Misir və Qətərdən olan vasitəçilərlə müzakirə edir.

Qeyd edək ki, iyulun 27-də HƏMAS lideri Xəlil əl-Həyyə, Qəzzanın blokadası davam etdiyi müddətcə İsraillə danışıqların mənasız olduğunu bəyan edib. Bundan əvvəl İsrailin Baş naziri Benyamin Netanyahu Qətərin paytaxtı Dohada keçirilən danışıqlarda iştirak edən İsrail nümayəndə heyətinin geri çağırılması barədə göstəriş verib. Bu qərar HƏMAS-ın atəşkəslə bağlı təklifə verdiyi cavabdan sonra qəbul edilib.

Stiven Uitkoff isə "X" sosial şəbəkəsində yazıb ki, Vaşinqton da öz nümayəndələrini Dohadan geri çağırıb. O bildirib ki, HƏMAS-ın son cavabı Qəzzada atəşkəsə razı olmadığını açıq şəkildə ortaya qoyur.

Yanvar ayında əldə edilmiş atəşkəsə baxmayaraq, mart ayında İsrail ordusu Qəzzada hərbi əməliyyatları bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtləri üzərində razılaşa bilməyiblər.