BAKI, AzerVoice, Səməd Əyyubov – İran hələ də uranı zənginləşdirmək imkanına malikdir və Beynəlxalq Atom Enerjisi Agentliyi (MAQATE) ilə əməkdaşlıq üçün yeni bir mexanizmə razılıq verib.

AzerVoice xəbər verir ki, bu barədə İranın xarici işlər naziri Seyid Abbas Əraqçi bildirib.

Onun sözlərinə görə, agentlik yaxın vaxtlarda İrana nümayəndə heyəti göndərəcək və danışıqlar aparacaq.

Əraqçi bildirib ki, texnologiya mövcuddur və bu səbəbdən də nüvə obyektlərinin yenilənməsi və avadanlıqların dəyişdirilməsi mümkündür.

“Obyektlərimizdə çalışmış çox sayda alim və texnikimiz var. Amma uran zənginləşdirilməsinin nə vaxt və necə bərpa ediləcəyi vəziyyətə bağlıdır” - deyə, Əraqçi qeyd edib.

Nazir bildirib ki, ABŞ prezidenti Donald Tramp zənginləşdirmənin tamamilə dayandırılmasını tələb etdiyi müddətdə heç bir razılaşma olmayacaq.

Bununla belə, Əraqçinin fikrincə, ABŞ öz narahatlıqlarını danışıqlar vasitəsilə ifadə edə bilər. O əlavə edib ki, İran sıfır zənginləşdirmə ilə heç nə təqdim edə bilməz, bu səbəbdən danışıqların mənası qalmaz.

İran Xarici İşlər Nazirliyinin sözçüsü İsmayıl Bəqai isə bildirib ki, BAEA nümayəndə heyəti yaxın iki həftə ərzində İrana səfər edə bilər. O qeyd edib ki, bu səfər əməkdaşlığın davam etdirilməsi yollarını müzakirə etmək məqsədi daşıyır və parlamentin qəbul etdiyi yeni qanun fonunda agentliklə əməkdaşlıq formatında dəyişikliklər zəruridir.

Xatırladaq ki, İran prezidenti Məsud Pezeşkian iyulun 2-də parlamentin təsdiqlədiyi, MAQATE ilə əməkdaşlığın dayandırılmasını nəzərdə tutan qanun layihəsini imzalayıb.

İyulun 22-də Seyid Abbas Əraqçi İranın gələcəkdə MAQATE müfəttişlərinin geri dönməsini istisna etmədiyini açıqlayıb.

Qeyd edək ki, İran ilə MAQATE arasında gərginlik, İran və İsrail arasında 12 günlük müharibədən sonra daha da artıb. Bu münaqişə zamanı İranın hərbi və nüvə obyektləri hədəf alınıb, nüvə alimləri sui-qəsdə məruz qalıb. ABŞ da bu qarşıdurmaya İranın nüvə obyektlərinə hava zərbələri endirməklə qoşulub.