BAKI,AzerVoice
Fələstinin Baş naziri Məhəmməd Mustafa Səudiyyə Ərəbistanının bir sıra ölkələrin Fələstin dövlətini tanımasında aparıcı rol oynadığını bildirib.
AzerVoice xəbər verir ki, o, bu diplomatik səylərin son nəticəsinin Fransa tərəfindən verilmiş tanınma qərarı olduğunu qeyd edib.
Baş nazirin sözlərinə görə, Səudiyyə Ərəbistanı iki dövlətli həllə əsaslanan ədalətli sülhün təmin olunması istiqamətində bütün mümkün dəstəyi göstərib və bu mövqe Yaxın Şərqdə sülh, sabitlik və təhlükəsizlik üçün əsas sütun hesab olunur.
Səudiyyə Ərəbistanı və Fransa 29 iyul tarixində BMT-nin Nyu-Yorkdakı mənzil-qərargahında iki dövlətli həll mövzusunda nazirlər səviyyəsində beynəlxalq konfransa ev sahibliyi edəcək. Konfransın məqsədi Fələstin dövlətinin yaradılması üçün praktiki yol xəritəsinin əsas parametrlərini müəyyənləşdirməkdir.
Baş nazir Mustafa bildirib ki, tədbir çərçivəsində bir neçə ölkənin Fələstini tanıyacağı gözlənilir. O, Fransa hökumətinin qərarını “tarixi dönüş nöqtəsi” kimi dəyərləndirib və bunun fələstinlilər üçün ümidverici siqnal olduğunu vurğulayıb.
Səudiyyə Ərəbistanının Xarici İşlər naziri şahzadə Feysəl bin Fərhan konfrans ərəfəsində verdiyi bəyanatda bildirib ki, tədbir Krallığın Fələstin məsələsində prinsipial və ardıcıl mövqeyinin davamıdır. Onun sözlərinə görə, Krallıq, Kral Salman bin Əbdüləziz və vəliəhd şahzadə Məhəmməd bin Salmanın rəhbərliyi altında, bölgədə ədalətli və davamlı sülhün qurulması istiqamətində bütün diplomatik imkanlarını səfərbər edib.
