BAKI, AzerVoice
Qəzza zolağında humanitar böhran getdikcə dərinləşir. İsrailin qeyri-kafi humanitar yardım səbəbindən bölgədə aclıqdan ölənlərin sayı artır.
AzerVoice xəbər verir ki, Qəzzaada son 48 saatda aclıqdan ölənlərin sayı 33-ə yüksəlib. Ölənlər arasında dörd uşaq da var.
İsrailin 7 oktyabr 2023-cü il tarixində başlayan hücumundan bu yana Qəzzada aclıqdan ölənlərin ümumi sayı 100-ü keçib. Həlak olanların 80-nin uşaq olduğu bildirilir. Səhiyyə mənbələri hər yaşdan yüzlərlə insanın ağır qida çatışmazlığı olan xəstəxanalara müraciət etdiyini və 17 min uşağın kritik aclıqla mübarizə apardığını açıqlayıb.
Birləşmiş Millətlər Təşkilatının UNRWA agentliyinin verdiyi açıqlamaya görə, Qəzzada ərzaq qiymətləri 40 dəfə artıb.
Açıqlamada, "Qəzzanın bir qədər kənarında üç aylıq ərzaq ehtiyatı var, lakin blokada bu yardımın bizə çatmasına mane olur"- deyə qeyd olunub.
Bildirilir ki, Qəzzada aclıqdan əlavə, temperaturun 40 dərəcəyə çatması, elektrik enerjisinin kəsilməsi və gigiyena qaydalarına riayət edilməməsi mülki əhalinin həyatını daha da çətinləşdirir.
Qeyd edək ki, Böyük Britaniya, Fransa, Kanada, Yaponiya və İsveçrə də daxil olmaqla 27 ölkə İsrailin Qəzzada dinc əhaliyə qarşı hücumlarını pisləyən bəyanat yayıb. Bəyanatda “Qəzzada müharibə artıq bitməlidir” ifadəsi işlədilib. İsrail Xarici İşlər Nazirliyi bəyanatı "reallıqdan uzaq" kimi qiymətləndirib.
