BAKI, AzerVoice

Bu gün 170-dən çox qeyri-hökumət təşkilatı ABŞ və İsrailin dəstəklədiyi Qəzzadakı ərzaq yardımı paylama sisteminin ləğv olunması çağırışı ilə çıxış edib.

AzerVoice-un məlumatına görə, onlar bu sistemin mülki əhalini ölüm və yaralanma riski ilə üz-üzə qoyduğunu bildiriblər.

Cenevrədə yayımlanan birgə bəyanatda 171 xeyriyyə təşkilatı İsrailə çağırış edərək “Qəzza Humanitar Fondu” planını dayandırmağa və yardımların yenidən BMT vasitəsilə koordinasiya olunmasına şərait yaratmağa çağırıb:

“Qəzzadakı fələstinlilər qarşısında qeyri-mümkün bir seçim dayanır – ya aclıqdan ölmək, ya da ailələrini doyurmaq üçün yemək əldə etməyə çalışarkən güllə yağışına tuş gəlmək.”

Bəyanatı imzalayan təşkilatlar arasında “Oxfam”, “Sərhədsiz Həkimlər”, “Uşaq Qurtarma Fondu”, “Norveç Qaçqınlar Şurası” və “Amnesty International” kimi nüfuzlu qurumlar da var.

Qəzza zolağındakı səhiyyə orqanlarının məlumatına görə, may ayının sonlarında fəaliyyətə başlayan “Qəzza Humanitar Fondu”ndan bu yana yardım paylama mərkəzlərinin və İsrail ordusunun mühafizə etdiyi yardım yollarının yaxınlığında baş verən kütləvi silahlı hücumlar nəticəsində 500-dən çox insan öldürülüb.

Qeyd olunur ki, “Qəzza Humanitar Fondu” yardımları BMT-nin rəhbərlik etdiyi sistemdən kənar şəkildə, əsasən amerikalı özəl təhlükəsizlik və logistika şirkətləri vasitəsilə Qəzzaya çatdırır. İsrail bu qərarı “yardımın silahlılar tərəfindən ələ keçirilməsi”nin qarşısını almaq üçün əsaslandırır. BMT isə bu təşəbbüsü “təhlükəli” və “insani neytrallıq prinsiplərinin pozulması” kimi qiymətləndirib.